ابنى يوسف (5اعوام ) حكى لى تلك الحكايه الى عجبتنى جدا جدا وحبيت انقلها لكم كما رواها واعزرونى حنقلها بلا تصحيحات ،ببرأتها .

كان يا ما كان يا ماما كان فى قلم والقلم ده كان بنت مش ولد...بنت كبيره ، والقلم البنت الكبيره ده كانت حامل ، حامل فى قلم صغير.
القلم الصغير جه
وكان فى كرسى الكرسى ده مكنش عنده بيت خالص ، فراح عند اخواته الكراسى عشان يقعد فى البيت عندهم شهر لحد ما يجيب بيت.....بس اخوه قال له انا مسافر ، فالكرسى زعل وساب بيت اخوه ودور على بيت تانى يقعد فيه
وكان فى كتاب والكتاب ده بيتكلم برضه ،الكتاب فى ناس ضربوه، ضربوه قوى قوى وكانوا حيموتوه، عربيه البوليس_ هو يا ماما الى بيجى ياخد العيان عربيه بوليس ولا اسعاف...لا يا حبيبى اسعاف الى هى بتاعه الدكتور والمستشفى _ عربيه الأسعاف جات اخدت الكتاب وراح المستشفى ،مفيش حد راح للكتاب المستشفى
الكرسى راح لصاحبه القلم الصغيروقال له يا قلم انا جى اقعد معاك شهر عشان معنديش بيت.....القلم قاله انا خارج دلوقت وقبل ما يكمل الكرسى زعل وافتكره حيعمل معاه زى اخوه ، لكن القلم كمل وقال تعالى معايا ونرجع سوا وتقعد عندى زى مانت عاوز
الكرسى والقلم عدوا على الولد واخدوه وراحوا للكتاب المستشفى
الكتاب قلهم مين قلكوا ان انا فى المستشفى
هما قالولوا احنا عرفنا....واحنا جبنالك اكل
الكتاب فرح قوى لما شاف اصحابه القلم والكرسى والولد
الكتاب خف بسرعه وروح مع اصحابه
الكرسى لقى بيت وبقى فرحان وعاش على طول مع الكتاب والقلم والولد

الذكر والكهف

الذكر والكهف                                        

 خرج من كهفه فى وقت لا يصح له فيه الخروج . خرج ليلا يهتز غضبا وقلقا ، يضرب بقدمه الغليظه الأرض فيخيل له انها تهتز تحت وطأه غضبه .

كان الوقت ليلاً وضوء القمر المكتمل ساطع يملأ الأرض نوراً لايرقى لنور الشمس ولكنه كاف له ليرى اين يضع خطوته القادمه الغاضبه ، لكن الخطوات الغاضبه عمياء لا ترى امامها حتى ولو فى نور الشمس .

اندفع فى طريقه لا يعلم الى اين ، تلاحقه صرخاتها ، تتسمك بقدمه أهاتها فيعدوا أكثر وأكثر كما لو كان يهرب منها . تتوقف الصرخات فجاءه فيتوقف هو عن العدو ويرهف السمع ، يبدوا لوهله انه سيتراجع ويعود لكهفه ولكنه مع اول صرخه ينتفض كمن تلقى ضربه بسوط من نارعلى ظهره فيعدوا اكثر قوه وغضبا من قبل. ومع كل ضربه قدم له تصرخ الأرض ألماً فيرفع رأسه الى السماء ناظرا بغضب اشد من السابق كما لو كان يضرب على ابوابها هى الاخرى بنظرات غضبه ولكن السماء تفتح له ابوابها متقبله التحدى  مطلقه عليه زخاتها تلاطمه على خدّيه وتوخز عينيه المُتحدّيه ليُِِسكت دقاته ، فيُغمض عينيه ويُطأطأ رأسه ويُعيد النظر لطريقه الذى لايتبينه الان من شده المطر الذى تحول فى ثانيه من مجرد زخات الى وبلٍ كثيفٍ .

يستمر فى العدو وسياط الالم تجلده بقوه اكبر فيعدوا بشده حتى ليكاد يحترق من سرعه عدوه فتُذيده السماء من ماءِها لتطفئ حرائقه ولكنه لا يأبه بنفسه ولا ما حوله وانما يعود عقله لكهفه الذى نسيَ اغلاقه بالصخره ......ثم يتذكر ان المطر سيمنع الوحوش الليليه من الخروج من مخابئها الان ....فيطمئن ويرجع لحاله مع الألم ...

يرى البحر امامه فينسى غضبه للحظه ويرمى نفسه بين احضانه الهائجه الاكثر غضبا منه ....

يغوص فى العمق الاكثر هدوءا ، ليفكر ويبتهل ويدعوا ، فلطالما استجيبت دعواته التى دعاها وهو فى احضان الموج.

دعى ان يرزق بذكر هذه المره وليس انثى اخرى ، دعى ان يعيش هذا الذكر ولا يموت او يؤكل كسابقيه .

تسأل لما هو الوحيد الذى لا يعيش له ذكر.....لقد قام بكل ما عليه من واجبات وقدم قرابين لكل الألهه ألهته وحتى ألهه اخوته وعشيرته .....فلما لا يرزق بذكر قوى يعيش مثلهم .

هو الاشد قوه بين اخوته والأغلظ يداً والاطول رمحاً .....فلما لا يرزق بذكر

يندفع برأسه خارج الماء ليلتقط انفاسه فتلطمه الامواج على وجهه وتذجره زخات المطر ، فيعود للأعماق مره اخرى .

لديه اربع إناث ومات له سته ذكور الذين لو عاشوا لكانوا له السند الان فى رحلات صيده اليوميه والتى بعد فتره غير بعيده لن يستطيع القيام بها وحده فهو ليس بقوه العام الذى مضى او الذى قبله .....

كل عام يرحل ترحل معه بعض من قوته ولا تعود .

من سيُطعم كل تلك الإناث ؟؟ خمسه إناث فى البيت ،

خمسه افواه مفتوحه كل يوم لا تتوقف عن المضغ و البلع ولا عن الصراخ مطالبه بحقها فى الحياه .

اين حقى انا ؟؟؟ اريد من يعاوننى على همومهم ....على اسكات افواههم الجائعه دائما ..

اريد ذكر.....اريد ذكور

يرفع رأسه مره اخرى ليلتقط انفاسه فيعمى عينيه البرق ويصم اذنه الرعد ....فيعود للأعماق مره اخرى

هو كان ذكراً قوياً ......كان اقوى اخوته الذكور جميعا ...ولكنه تمرد على الحياه وسط عائلته ومشاركتهم صيده الوفير....استكثر عليهم قوته وقرر ان ينفرد بها لنفسه ليصنع عائلته وجماعه صيده الخاصه . الان هم يصتادون معا وقت الوفره ويتقاسمون ما يصتادونه وقت الجفاف....اما هو ومن مثله مِمَن انعزلوا عن جماعتِهم وكونوا جماعات متفرقه فلا يتمتعوا بمثل ذلك الأمان المتوفر وسط الجماعه الكبيره.......ومع ذلك كان همّ الجميع همّ بسيط فهم جميعا انجبوا الذكور الذين بدأوا يساعدوهم فى الصيد، اماهو فكل من انجبهم من ذكور ماتوا او اؤكلوا .....

لما لاتختار الوحوش فرأئسها من الإناث ....تركت له إناثه تنموا وتكبر وأكلت الذكور الاكثر نفعا واهميه ..

يخرج رأسه مره اخرى ليلتقط انفاسه فيخيل له ان صرخات انثاه توقفت وان المولود نزل الى ارض الكهف الرطبه وانه بدأ الصراخ مطالبا بحقه فى الحياه هو الاخر، فكر ماذا لو كان المولود ذكر قوى مثلى وكبر وتعلم الصيد ثم تركنا وكون جماعته الخاصه مثلما فعلت مع جماعتى ، ماذا سأفعل وقتها وسأكون صرت اكثر ضعفا من الان، قرر الغوص فى الاعماق مره اخرى......فهناك يكون جلي الافكار .

إناثه يبدوّن قويات مثله ..... فالكبرى تشبه الثور فى غلظتها وضربه قدم منها كفيله بتفريق جمع من إناث القبيله .

والثانيه تشبه فرس النهر هادئه ولكنها قويه لا تظهر قوتها الا وقت الحاجه فتباغت عدوها الذى ظنها لوهله ضعيفه طيبه ، ابتسم حينما تذكر انها تشبه فرس النهر حقا فهى تأكل كثيرا جداً .....اتسعت ابتسامته فضحك وهو يقول فى نفسه تحتاج صياد متفرغ لسد فمها وحده .

والثالثه تشبه الفيل فهى قادره على حمل الصخور الثقيله للكهف طوال اليوم دون كلل او تعب او تأفف فهى مع قوتها صبوره وهى الان اصبحت تزحزح صخره الكهف الكبيره كل يوم وحدها فتدخل نور الشمس كل يوم للكهف وتوقظنا وفى اليل تعيدها مكانها فننام امنين شر الوحوش.

والرابعه مع صغر سنها الا انها ذات قبضه قويه ، عندما تمسك بقدمى وانا خارج للصيد لا يخلصنى من قبضتها الا امها عندما تحملها .

خرج برأسه من الماء مره اخرى فوجد ان غضب السماء قد توقف ووجد ان البحر غدّى اكثر هدوءا وهو نفسه هدأ كثيرا .

سبح فى اتجاه الشاطئ وخرج من الماء ، سار تحت ضوء القمر المغسول مرتاح لما توصل اليه من قرار .

خطا بخطواته نحو الكهف لا يهمه الوحل الذى يعيق طريقه ففى جوفه اصبح هناك فكره سرعان ما ظهرت على عينيه ووضحت فى ثبات نظراته وخطواته .

هو سيعلم إناثه الصيد .

سيكون هو اول من فعلها .

سيهزأ منه اخوته ...

سيقولون انه لا يستطيع ان يطعم إناثه ولا يستطيع ان ينجب لهم ذكرا يطعمهم من بعده

ولكن هل هو من يطعم اخوته إلاناث الان وامه ؟؟؟

ماذا لو انجب ذكرا وتركهم هو الاخر ؟؟؟؟

وماذا لو لم يجد ذكور القبيله كلهم رغبه فى احدى بناته وهذا اصبح يحدث كثيرا الان ....هل يتركهن فريسه للموت جوعا ؟؟؟؟

ام يتركهن يقدمن قرابين للألهه لانه لا يوجد من يطعمهم؟

دخل كهفه بوجه غير الذى خرج به حمل طفله الملفوف فى فرو أرنب برى ولأول مره لم يبحث ولم يسأل هل هو ذكر ام انثى.

لانه قد اتخذ قرار لن يختلف سواء كان المولود ذكرا ام انثى .

هو سيعلم إناثه الصيد .

بصيص امل

 

جلس فى غرفته المعتمه يتأمل حياته المعتمه ايضا وجد انه لم ينجز اى شئ فى حياته الا شهاده بلا فائده لم يجدها تستحق حتى ان يعلقها على الحائط فالحائط اكتفى من المعلقات ....فقد علق عليه اوجاعه واحلامه فوجدهم متساوين فى انهم بلا طائل فلا هناك عائد من الاحلام ولا فائده من الألم .......مد يده الى الطاوله التى بجانب سريره عله يجد سيجاره امس باقى بها بقيه.....وضع يده يتحسس الطاوله فلم يجد شئ التفت لييبحث بعينه فوجد دائره ضوء صغيره تعترض يده ......انها قادمه من ثقب فى شيش النافذه ....هى نقطه الضوء الوحيده التى تتخلل الغرفه متسلله ....لو عليه كان سد ذلك الثقب ولكنه اول مره يلاحظه ...اخذه اللعب فى ذرات الغبار التى تلهو فى نقطه الضوء ....ثم سحب يده ليتعقب نهايه هذا االخيط الضوئى المتسلل فوجده ينتهى عند حامل سيديهات الكومبيوتر الخاص به ووجد نقطه الضوء تقف عند سي دى بعينه كتب عليه ( سيطر على حياتك ) د. ابراهيم الفقى

احمر لون الدم

                         احمر لون الدم

لو سألت دولاب هدومى هل سبق ودخلك اللون الأحمر كان حيرد عليك – لو أمكن له الرد – ابدا ولا عمرى شفته

طول مراحل عمرى مدخلتش اللون الاحمر دولابى ولا حياتى....والسبب فى كده عقده قديمه

كنت وانا صغيره خدودى حمرا وشفايفى حمرا قوى فكانوا صحباتى بيتهمونى انى حطه ذبده كاكاو حمرا وكان اساتذتى بيحرجونى ويقولولى روحى امسحى شفايفك دى وكنت اضطر احلف انهم حمر كدا لوحدهم وعشان يصدقونى اقعد ادعك ادعك ادعك لحد ما يوجعونى و يحمروا اكتر واكتر

المهم كانت عقده جامده لحد اما كبرت فاللون الاحمر ده انسحب من جسمى ولا بقه فى خدود وردى ولا شفايف حمرا ومن يومها بقيت احب الاحمر ودخلته فى كل حياتى بدرجاته ....ستاير اوضه نومى حمرا

حيطه فى الانتريه نبيتى

اوضه بنتى وردى

وهكذا....

ولكن فى يوم من الايام صحيت من نومى لقيت ستاير اوضتى بقت سودا ولون اوضه بنتى بقه ابيض والدنيا حوليا بقت الوانها ملخبطه كده رمادى على اسود على ابيض

الاول مفهمتش ايه الى حصل وبعدين لما دققت فى كل حاجه اكتشفت ان اللون الاحمر اختفى تماما من حياتى......والادهى من الحياه كلها

الله اللون الاحمر راح فين ؟؟؟؟

لما مرت ايام على الحكايه دى وبحث الناس الباحثين اعلنت وكالات الانباء عن سبب اختفاء اللون الاحمر

لقد لوحظ ان لم يبقى فى العالم ما هو احمر الا لون الدم

الدم المسال فى العالم سحب اللون الاحمر من باقى العالم

لأن اللون الاحمر مبقاش ملاحق على تلوين كل هذا الدم المسال فى العالم  فقرر انه يتفرغ لخدمه لون الدم وحده فقط

لعل الناس تاخد بالها مما يحدث

وجهه نظر تحترم

بس هو الدم المراق فى العالم بقه كتير قوى كده لدرجه ان اللون الاحمر مش حيقدر يلون حاجه تانيه غيره؟؟؟؟

تقريبا دى حركه من اللون الاحمر عشان يخلى العالم ياخد باله من مدى جرمه

 فيبطلوا يقتلوا بعض

فترجع بهجه اللون الاحمر للعالم

ويرجع العالم بالالوان مره تانيه

طلع اللون الاحمر مهم جدا فى الدنيا

لون الحياه

ولون الموت

بس هو زهق من تلوين الموت اكتر من الحياه

واشتاق يلون الحياه اكتر من الموت......

فعمل الحيله الذكيه دى

الف شكر للون الاحمر...........يمكن يقدر على الى مقدرش عليه العالم كله

وبعد ان اجتمعت الامم وتشاورت الشعوب قرروا الاتى : لابد من اعاده تلوين العالم

لن نستغنى عن اللون الاحمر

حلو الكلام ده........نجحت الخطه وانتصر الخير الى جوا قلب العالم

وصحيت فى يوم لقيت الناس ملونه حياتها تانى

لقيت اللون الاحمر رجع تانى .....بس بشكل غريب

مبقاش فى درجات من الاحمر

بقه درجه واحده بس

احمر

نزلت الشارع لقيت واحد ملونه عربيته كلها بالاحمر القانى...وحشنى اللون ده ..... لما قربت منه ولمسته لقيته دم

دم

العالم قرر ان عشان يلون حياته من تانى بألوان زاهيه لازم يقتل اكتر

ويلون حياته بالدم

ببص لقيت واحد ملون جزمته بالدم

وواحده حطه روج من الدم .....وكل شويه تستحلى طعمه فتلحس شفايفها وبعدين تحط تانى

وواحد ملون خدود بنته من دم بنت فى نفس سنها عشان يبقى لون طبيعى اكتر

وفى الى بيحب الاحمر قوى فالون بيه حيطان بيته كلها

وعاد الاحمر ينتشر فى عالمنا .....ولكن احمر بلا درجات مختلفه

فقط درجه واحده

احمر لون الدم

خاف من خيالك 2

هو الاحسن ايه ؟؟؟...........
ان حياتى تكون واقعيه كده ومركزه فى الى بيحصل حواليا وعايشه الواقع قوى ومنغمسه فى تفاصيله
ولا ان الواحد يبقى خيالى ورايق كده ومريح دماغه من الواقع والى فيه وقاعد فى خياله مرحرح ومأنتخ كده
هو ايه الصح فى الحالتين؟؟؟؟؟؟؟
انا دلوقت فى منطقه متأرجحه بين الاتنين
بشاور عقلى انى اهرب للخيال ..........................واتجنن يعنى...اه ماهو اصل المرادف لكلامى ده انى عاوزه اتجنن
طيب هو الجنون اختيارى ولا اجبارى....هه؟؟؟
يعنى مثلا لو حد فى المرحله الى انا فيها دى وقرر انه ينسحب من الواقع المرير...( الى احنا ....مش عيشينه ده .......)..ويروح خياله المريح البرح البحرى المرحرح.........وقعد هناك واستمخ من القعده فنسى سكه الرجوع وبقى هو ده الى راح فى سكه الى يروح ميرجعش ........يبقى .ده ايه ؟؟؟.......
اختار جنونه ؟؟؟؟....
ولا هو بس حب يستريح شويه هناك بس نسى يرجع ازاى؟؟؟
طب انا لو عرفت حد السكه قبل ما اروح واتأخرت شويه.... الحد ده حيفتكر يروح يجبنى ويرجعنى للواقع ولا مش حيعرف يروح اساسا؟؟؟؟
طب انا لو رسمت خريطه واخدتها معايا.....يمكن اعرف ارجع؟؟؟
طب هو انا عاوزه ارجع اساسا؟؟؟
طب هو خيالى ده له عنوان.؟؟
وهنا بدأت اخرف
عنوان ايه ؟؟؟...................ده توهه كده....وسعايه......
...حته فاضيه وواسعه.............كل شويه املاها شويه حاجات واما ازهق من الحاجات دى امسحها تانى واملاها بجديد مختلف....
وهو ده التغيير الى على حق
تعرفوا لو وصفتلكوا خيالى ده يمكن تحبوا تيجوا عندى شويه
واهو القى حد غيرى يعرف السكه برضه ونرجع سوا
ويمكن تحبوا القعده فتنوا هناك معايا
الله طب ونبقى عملنا ايه؟؟؟
انا بروح هناك اساسا عشان مشفش خلقه حد منكوا
نرجع للمشكله المعضله........انا عاوزه اروح واجى براحتى  وخايفه اروح وماعرفش ارجع فاتحبس هناك..............
لسه حته من عقلى شغاله وبتلح عليا انى اتمسك بواقعى شويه اكتر
بس لحد امتى الحته دى حتفضل شغاله؟؟؟؟
امتى حتستسلم؟؟؟؟؟؟؟؟؟؟؟؟؟؟؟